Muna Warah
Gerelku Muna anak kedue ari roa bersudere. Abang ku si sulu bere i talu bang kul, abang kul ku tengah kuliyah i Takingen, uwe gere olok ulak ku umah.
Aku mukalé kin nisé, biasae ike ara bang kul aku dor ijule é ku sekulah nik keréta ni ama.
Soboh ni lebih sejuk ari soboh mané, seketike mujadi pesam mumengé keber ari Fatimah i pintu gerbang sekulah.
Kucube gere ku iroi cerak oya. Kebetapé naru ni perjelenen ku kelas tereroyan ilen cerak si ben ku pengé oya ne. Bahwa tulu lo mi sekulah ni kami malé munaran perpisahen ku Atu Lepés.
Sebenaré gere mukunah ike malé kusi pé acara perpisahen, masalahé séni ekonomi ni keluargaku tengah kaco.
Ama tengah irawat i umah sakit Datu Beru. Sebelemmé sempat irawat i RSU Muyang Kute i daérahku. Kune caraé munyawahen ku ine keber kegiaten sekulah ni sementara perpisahen ni nge ku nantin.
Aku mungamuli sén, sayangé sén si kukamuli nge terpakék kin mubeli uak ni ama.
Ara rasa gere gure wan até ni. Kubayangen mupisah urum pong-pongku sementara ama seni tengah i rawat i umah sakit ilen.
Sawah ku kelas ibu wali kelas munyawahen pengumumen.’’Acara perpisahen te, kite aranen i ton si dekat dekaté i Atu Lepés.
Minggu arap so kite ku Atu Lepés si lagu hasil rapat urum komite bahwa kite munemah kero kin mangan ruhul nye penan ari umah masing-masing. Sekulah henye munangung ongkos motor we.
Aku seyum urum kekire antara beluh berjejelen perpisahen, mangan ruhul, sén penan nye ama urum pong-pong.
“Inoh kunehmi weni kusih mi turah kupérah sén kin dediang ku.” Cerak ku wan até.
Ulak sekulah ku beraninen diriku munyeder ku ine, walaupé atéku gunah urum senyum aku kunul i samping ine sitengah mujerang jantar i keliliken utem.
“Ine, isekulahku malé ara perpisahen ku Atu Lepés. Kerna oya aku mah kero ruhul urum sén penan”.
Ine pebening sejep nye olik né aku.
Kené ine “Kite éngon mulo keséhaten ni ama nan pé sén pé gere ara. Kite muniro tulung ku Tuhen kin kesehaten ni ama buge ama tir jeger, ine pé gere ara murejeki ilen“.
Aku pé pehem kin keadaen ekonomi ni ama, urum keadaen ni ine, tapé tah mukunehpé até ni lagu gere réla ike gere pas urum acara perpisahen. Kin munenang ni kekirengku urum gere kin pemikeren ni ine.
Aku beluh ku arap ni numah. Kunul munéngoni empus kupi silues, empus ni masyarakat Kampung Penosan Jaya Kecamatan Permata.
“Inuh kunehmi ya? kusi turah kupérah sén kin beluh jejelen perpisahen? “. Cerak ku iwan ni até.
Ari sekiter 5 metér kuéngon kak Erni sudere sara ni anan ku umuré i atasku waluh tun. Wé géh ku aku si tengah kunul pebening. Wé pakék baju empus ilen lengkap urum kantong pengutipen kupié. Gere ara bececerak langsung ngune.
“Héh hana si pikiriko? italu-talu gere pengé. Kune nge keadaen ni ama.” Wé mungune.
Kujeweb urum salak muringut. “Ama i umah sakit ilen kak. Ine iyo mané ulak ari umah sakit. Ama séni i jege urum abang kul. Kuneh mi aku ni kak, kami tengah gere mesén kin beluh jejelen ari sekulah. Hana si nguk kubueten?”
Kak Erni mejem nye perin né
“E… dik, aka pé pehem kin keadaen ni kil. Buge kil pé tir pulih. Keta lang ke lo mingu, kune ike lang ko beluh ngutip kupi ku empusku?”
Gere delé cerakku ku e nen sipedenni aka Erni. Ku ucepen sukur wan aténgku ara jelen keluer ni masalahku ni.
***
Lang néa eber-eber ilen mari mangan soboh aku beluh ku empus ni aka Erni nye inepé ku umah sakit. Galak pedéh aténgku nguk dediang sire mungenal rejeki ngutip kupi si ilang. Paling gere nguk sekejep kulupenen kesedihen ni aténgku, si paling gure kurasa aku nguk ngutip sawah tulu tém.
Iyo lao ulak ari mungutip kupi ku éngon ama kunul iarap ni umah, nye ku kunei. “Selo ama ulak? Nge arake mujeger ama?”
“Alhamdulillah nge mujeger, ruhul ne ama nge iumah, kené ine mu, ko mérah ongkosen ngutip kupi ku empus ni ibimu?” Kune ama.
“O ama. Ini kin sén sekulahku ara perpisahen, nguk ke beloh aku ama? Sine ibi nosah sén dele pedi ara tige ratus ribu.” Kusederen ku ama urum galak ni aténgku.
“Alhamdulillah ibi ma gere iyosahé sén ongkos kin ko, tapé ibelie kupi si kutip koa ari empus sé. Peren nen berijin ku ibi ma urum aka Erni ma. Maapen ama, ko turah ngenal sén kin keperluen sekulahmu. Beluhnye perpisahen urum sekulahmu, jegei diri, gelah jimet, rajin belejer keti nguk munyamung sekulah.” Kené ama.
***
Lao mingu si nge itentunen beloh perpisahen pé nge sawah. Kami beluh ari sekulah ku Atu Lépés i Kecamaten Timang Gajah urum motor perhubungen Bener Meriah. Motor ré nge berparkir jeroh i elemen sekulah SDN Penosan Jaya.
Beluhe jem 08.15 WIB wan perjelenen kami mudemu urum jelen simuleluang, Ariyani pongku sawah peningen nye pelowahen.
Kuseder ku pak sepir “Pak nguk ke teduh sekejep, ara pongku peloah pak.”
“Bohmi.” Kené pak sepir.
Nye kami pé turun ari motor méh oya Ariyani pé mulei jeroh mien. Kami pé sesidahi nuet foto urum pemandangen si belangi lagu batang kayu si ijo. Téba pong ku munulung Ariyani mubersihen loahé.
Ibu guru munosah pengarahen “Nge tenang ke béwéné. Ini i Simpang Tige ilen. Sejepmi kite malé mulewati Bandara Rembele urum lapangen Pacuen Kude”.
Kami melewati Pasar Lampahen nye mayo ku jelen item si nge i lewati urum sara motor kul lagu motor ni kami ni. Untung pé méh né lancar nye kami pé selamat sawah ku Atu Lépés. Gere terasa nge sara jem wan perjelenen, jem i pumuku nge jem 09.15 Wib.
Mataku munéngon ku kulem-kulem si mujaril wih hé ku wan ni kulem si ara i Atu Lépés. Ton né belangi i kelilingi bur nye empus kupi.
Aku gere seber malé selalu mayo ku wan ni kulem, rupen pé wih hé bengi pedéh. Aku pé tir tangkuh ari kulem ma renye murum urum pong-pongku.
“Entah kite denang alas i bebalén si nge kite janyi. Mari mangan ruhul baro nguk kite niri mien.” Kené ibu guru. “Rintah ari ibu guru siep kami bueten.” Kené pongku.
Aku urum pong-pongku munulung ibu guru mudenang alas, mungerat timun diké, mubagi wih minum ku pong-pong. Ara pong-pong pé si mubantu guru mununu gulé.
Méh oya aku beluh mungelilingi Atu Lépés sire berfoto-foto urum pong-pong. Ara si niri seruel lé murébék si kerna jejorosen né nge mukarat. Nge mari bedediang kami italu ibu guru malé mangan ruhul, mari mangan ruhul kami bantu ibu guru bersih-bersih, mari oya kamipé nye niri mien.
Gere terasa nge sidah jem kami niri, nye ibu guru pé munyeder ku kami bahwa malé tir ulak nye turah siep-siep. “Nak kite ulak jem tige iyo ni. Seni nge jem due nge nguk kite besiep-siep.” Kami méh né nge siep ulak, nye nik motor. Alhamdulillah, perjelenen ulak gere ara né sesanah.
Gere ara né si peloah termasuk Ariyani. Jem empat iyo nge sawah kami ku sekulah. Jema tue kami nge murai ku elemen sekulah. Aku i rai bang kul. Denem ku kin dengan ku si sara ni polih seketike munéngon wé énggéh ku sekulah murai aku. [SY]
Bener Meriah, Oktober 2024
*Penulis begeral Muna Warah lahir terlao 8 Februari 2012. Séni sekulah i kelas 8 SMP Negeri Satu Atap Permata, Kabupaten Bener Meriah. Taring i Nusanjaya, Kecamatan Permata, Kabupaten Bener Meriah. Anak kedue ari roa bersudere ni bercita-cita mujadi guru.
