[Puisi Bahasa Gayo] Beluh ni Abang Munaringen Basa
Hakimiadi Sudirman
Jarak ari rakan
Mupesir ari sudere
Keber gere bersisawahan
Minter gerle mengé berite
Sakitmu gere berunger
Minter keber nemah berite
Aha nge beta retak ni peger
Celam-celom kegere berbelide
Aku itangkir jarak rum kao
Ngerku sehat sehat rembege bedenmu
Wan berite rupemu pepien lao
Doa kutuju sehat abangku
Nge bata kadang retak si sara
Takdir ni Tuhen kin kao abangku
Mutik ruluh bunge pé mala
Selamat jelen serge taonmu
Gere berélah mamur laohku
Kucak kucak di ilen untilku
Buge seber kao aka pedihku
Buge aku nguk kin penumpu
Langkah rejeki petemun maut
Oya nge jelas nume kite empu
Kenge sawah kasé nomor urut
Gere terelaken kusi beluhmu
Abangku si mutuah
Gere teridah kune sakitmu
Gere len kering cerakmu si luah
Jegei turah masa sehatmu
Oya manat kuingeti turah
Gere bang salah ke penejerenmu
Memang cerakmu sesire berberakah
Rupen oya naring basamu
Manat si mutuju
Sehat
Sakit
Rejeki ari si sara [SY]
Tanoh Gayo, 2025
