Salman Yoga S
Jingki Roda
Ohya, i sagi ni wih kul si jernihne ara sara jingki wih si olok geniling. Jingki ini igeraken urum sara roda kul berbentuk bulet, roda kul ini ara papan mupetak jeb ringkelenné.
Petak papan oyale si isi wih manut si géh ari uken, kenge engkip renye wé ku tuyuh demikien seterussé sehinge rodawa mujening lagu ban ni sepeda. Ku atas ku tuyuh i anut ni wih.
Jema-jema iyoné munalué urum geral jingki roda. Bentukké bulet dis urum ban motor raksasa. Ketapé ban si ini mubéda, itos ari petak ni papan si isusun sedemien rupe sehinge bentukké mujadi bulet.
Ibagin atas si bulet lagu ban motor raksas a ara rering 25 jumlahé, jeb-jeb rering jarakké setengah depa. Roda ini nguk muputer mekit apabile dianuti wih si deras ari uken.
Aku den Nila engingku gati bediang i sekiter jingki wih si geniling oya, Anan Sur arawe mumakati kami den ine muningo pingen atawe sekeder mubasuh kiding isoné.
Mejen kami iosah kesempaten bediang nos kapal-kapalen ari ulung ni kayu kul, renye ianuten sa ulen-ulen sawah kutetajuren.
Mejen kami niri sire mén bersesiremen, mumérah gerep iseselang den i tuyuh ni atu. Mén jejojonen urum batang ni awal sire bersisangulen urum kedik galak.
Kerna penasaren den ménét mubetih aku mungune ku Anan Sur.
“Anan, mukune kati roda jingki wih ni gere muputer?”, pengunenku si iangukni Nila engingku ménét mubetih.
“O oya, jingki wih muputer ike nge gaéh wih ari uken so”, jeweb Anan Sur.
“Hanati gere nye ianuten dih nye seni Anan, kati kite reroante nguk munéngonné muputer?”, pengunenku mien si juge iagukni dik Nila.
Urum senyum kucak renye Anan Sur mujeweppé mien.
“Win, Nila! Jingki wih ini ijarili wih den muputer waktu ike igunenen seje”.
“Igunen kin sana Anan?”, kunei Nila, sire mumanangi kami urum Anan Sur si mujewebpé.
“Jingki wih ini igunen ketike malé munutu raom pelin. Ike gere munutu raom atawe jagong ya gere igunen”.
“Selohen munutu raom den jagongngé Anan?”, pengunenku den Nila serentak kerna kami ménét mubetéhé.
I kute si lagu ini, si ara henye roda ban ni motor, ban sepeda, honda atau roda sepeda si muputer wan tengah remalan seje.
“O ike lagu noya turah mungune kite ku Awan mulo ge, selo malé munutu raom”, jeweb Anan Sur sire beluh urum ine munéméngni time berisi wih kin minum.
“Ngeke, entah ulakmi kite kasé kunei ku Awan mu dih boh”, kené ine. Besemet.[]
Baca juga : [Novelet Bahasa Gayo] Jingki Roda Wih Kuteni Reje (Bag. 1) : Tumbuni Ni Ama
