[Saer Gayo] Zionis Koro Jamu Israel i Palestina
Salman Yoga S
Wan buku-buku isebut Israel ni jema géh ari kampungé
Mumérahi uten sigere ilen betebang den betene
Mumérahi belang sigere ilen betebes den berpancang
Mien mumuger wan pesaka ni Palestina
Mumantiken umah wan tanoh ni jema
Nge muratus tun ari ulun ku ulun sawah muebed masa
Koro jamu renye munaos uwer berpantik belide tersik
King den kuet berpelitik kin tungkelen pembehu
Gerené mubetih isi kin duru-uken malé kin ulu noméwé
Hinge mejen lagu mugegile akallé melén ari negara si delé
Mulo berumah rerampé sampé berumah atu
Wih keruh kin ulun tawar
Si pedéhé ijawén
Kuning tenaruh kin pengeruh
Belbuken kin mata ni waih
Asal wan sejarah nge jelas betulis
Pengaruhni zionis palis ni sunguh terlangis
Usi diri ijadin kin tejem ni rui
Asal cabangé ibubun kin kin pembelahé
Jema ingker si bergeral Mustafa Kemal Atathur
Jema bibes si jinger lagipé pané munatur
Ari legihhé renye bayak den kin pemimpin ulu rintah
Ari ringillé renye kin perau kul munarung gelumang
Ari Islam si berkah rahmah iubahhé mujadi sistem liberalis
Sawah azan ilarang, masjid ibubun den ijadin né kin musem
Sesop marwah ni umet muslim Turki masa oya
Makin lo makin mujejadi renye nébah kusegele langkah
Militer ijadin kin ulu ni parang den kin taji pemenang
Pelitik licik kin selang baji, morip pepalu wan megahni Usmaniah
Berkiblat den betiru ku barat negara demokrasi
Ari sistem kesultanen islami ku haluen liberalis sejati
Sehinge siwangi-wangi wan kesultanen Turki pé bau rengi
Lagu terasi wan pingen batang edang bergulé dengké
Mustafa Kemal Atathur ni sibenaré jema pinter wan militer
Utokké encer minsel lagu munos jelen aspal urum wih ni tér
Cumen imen né éngél penadi den perinsippé olok mubeda
Nesué kul ukhuwahhé tingir, khamar ihalal né warisen bagi rata
Hukum Islam si berseriet ibedet seketi iubahé urum gaya barat
Jema derhaka kin agama den negaraé oyale sibenaré Mustafa ni
Hinge maté é pé lagu senuen wan kemaro péngép-éngép
Ari gatal kulit sebebpé muloé ikekayo renye makin mulelék
Ari mutuah bayak renye sakiten metuh lédak lemék betémpék
Ari mata pubebedék sawah kiripen mukecép benasa den maté
Rembege mayat té isebu gerené iterime bumi
Tanohpé bengis gere suke enti mulo Tuhen Simaha Mulie
Akhéré Mustafa Attathur ni dis urum Fiaun i masa nabi Muse parié
Mayat té pejejik kering mesing buruk nge bau bangké
Jema munentong mantong pejenyong sire munup ni éyongé
Keta isebun le mét té urum atu marmar bersemén kubur né
Jema méh geléson mésom-mésom beluh sara-sara
Akheré ibubun kin monumen wan sara museum jasat té
Kati kin pengaluten den ikhtiber ku kite béwéné
Asal ike tengah ara enti renye jis tiak atas
Ike tengah kaya enti dalih jejengisen jengkat kerna mupangkat
Ike tengah berkuasa enti nesu ter ulu imen ku Tuhen ter duru
Ike tengah i atas enti renye lagu kurik pedatas
Baur lagu gere né murelas, téwah lagu gere né mempas
Gelah igunen kepanén den kepemimpinen ku jelen agama
Munulung heme jema papa si nyanya-nyanya
Pakir miskin si gere mureta kerna simubédan kite oyale taqwa
Kerna wan negara rakyat jelata le sibenaré ine urum ama
Takéngen, Mei 2021
