[Puisi Gayo] Masker Terakhir
Salman Yoga S
I kudukni umah muhedep ku baur perempusen kupi
Tali-tali jemuren menalo
Kuyu munengutné munutup pemandangen
Mata iselaputi si munutupi kipessé
Tetapé awah peperngah munisep kuyu
Kampung-kampung terkepung mengungkung terkurung
Tetapé kute-kute pecerangah lagu belanga i wan uren
Musiu mutoét ari porak lo bedetang
Gere nguk munuke awah mubelalaken mata
Icatat wan jeb lembaren koran
Bahwa kite tengah berjuang
Masker terakhir nge hilu
Awah isompong urum gelépék
Ilarang tangkuh ari umah
Tapé kuren pelongkop pingen-pingen retak
Ilarang pujejamah
Tetapé jelen-jelen semakin naru urum garis putih i lah hé
Masker pemarin
Berakhir i tali ni jemuren
Kite daring beden urum sengap
Renye betapa berbilang ulen
Kati ulak mien mujemur upuh urum kuyu
Takengen, 2020
*Dipetik dari Buku “Pungi den Pakanlaya”, TGI, 2020, hal 145.
