Oleh : Iwan Kenangan*
Muripmu uluh asal simen si gere besuen, dele si sengeje i suen i geniring ni wih atau i ulu ni empus. Muripmu rubu urum ulungmu si ijo. Pucukmu urum ulungmu ara simen manfaatte enguk kin pakanni urip-uripen, kin uwak ni tuke sediken mayo kuyu urum ketolen kayap, ike i jurah kin orip-oripen ku heme ni Tuhen ni kerah gere melak.
Mejen-mejen ikot ni jema i bubun kin penyapu, kin pembie ni karit renggelak iwan ni jamur empus.
Tengah kucak ko i gelepi tamas dabuh ngekul i longohiko mien tamas si karit. Rubumu uluh enguk berlongoh sediken gaeh uren orom porak ni lao.
Cumen turah inget tikik, enti bebarang jeru kowan perdu ni uluh, mera kase iyone umah ni unik urum gemeto, ike mukertup pora mera gaeh sara uwer ku kite, enta sentan ulak ku umah mera kase gere i tene pake umah ni kite, kekanak nipe mera kedik muserlak gagak si kerna mutemong ter pipi gumong. Tebok ter eyung kemung termata.
Uluh si tue mien mersik, mejen ate ni macik mumekiri kao, kin sanahmi keta ko gere i pergunen. Bewenne si kami perlui enguk ko gere melak.
Kin sesongkotenpe kao mujadi bangur rara wan dapur penirun peniten, kin tersik belide, kin benkon supu serule, penjemur upuh, kin silih ni bako, kin pancang ni tomat urum lede, lagu bewenne kao lepas gere ilen kao kin pemangang ni iken.
Kin paroken penyangkulen, galah ni perau, lumpe totor tetetenen, mejen kin penjelgit ni asam kelele, penupang ni awal peloahen. Jemen deba kin lante ni umah, belbes ni teroto, penjolok peneldiken iken asal mejen kin tikon mejen kin uluh runcing alat perang.
Subhannawaullah, Masyaallah, i jadin ko uluh ni sesara bentuk cumen gune e ku kami manusie dele olok simen.
Silepas den si pedih bersukur kami ku Tuhen dele pedi nikmat si i osahhe ku kite heme e, sampe enguk ko kin peger munyelamat ni a deleni senuen. Kunehmi keta kami mubeles jasa mu uluh. Bierpe terkadang ipergunen kin kin pemepok sampe mamur luh ni mata.
Beta le kire kao uluh, kin ikhtiber ku kami manusie, buge enguk lagu ilmumu kami morip. Mujadi jema si bergune kin urang tue, heme didele, agama, bangsa baring i sihpe taon den kuneh pe parie.
Ara deba uluh sigenancing, pucukke surang-saring kene jema uluh sungsang geral le ipergunen kin siserume bage, buet hine musyrik hukumme.
Gelah kite tunung lagu peri ni nabi:
“si jeroh-jeroh e umetku oya le jema si mugune kin jema dele”.
Dep beta naru den atasmu uluh, mu rues mutetungku naru gere lupen ko muleno ku tuyuh petungkuk ku bumi, gere sombong gere angkuh sunguh renah diate. Asal gere sidebane lagu manusie, pora ara renye nome ruhul, mupangkat pora renye lagu gere ramah bierpe penah sara bantal nome, muringit dele renye tiak atas, munosah deba mujangkit lagu gere penah sulit wan tengah nyanya.
Uluh uwo uluh kao muikhtiber naru
Uluh di atenglu mununung filsafatmu
Wan tegeppe nguk i ngengal
Wan atasse nguk ijangko
Beta le kire perumpamaen, bierpe kao nge atas gere lupen ko ari si asalmu den i longohi ko si kucak urum konot. Gere mungelsih bierpe sipet ni kude kadang iseren ku kao. Asal nge beta bang tuah, wan legih i hine jema tape ike nge ara gere mutup mata ku kuen ku kiri, berbagi urum senang ni ate.
Kenak ke beta simen kite manusie gelah mudesi untung, enti jengkat, sepuh, sergak menuruhen behu, pangkat, harta den derejet. Kerna i mata ni Tuhen kite gere mubeda, asal ari tanoh ulak kase mien kite ku tanoh. Simehate amalen urum ibedet, ilmu bermanfaat sedekah jariah den anak amal saleh.
Ku atas asa ko mupucuk lemi ku tuyuhpe kao mujantan tegep. Bier renggiep kire bertangang ringit, bier pe bersupu pirak murip gere ilen mulie kite i mata ni Tuhen. Ike gere ilen kite mugune kin ama ine, biak sudere, agama den bangsa.
Ibarat uluh sara perdu, si seruntun pusok si bersembilu due, simuturut payu ari kucak sawah ku kul. Kenak ke beta le kite manusie gelah bersijegen ulaken ku sedenge keramat mufakat behu berdedele. -TAMAT- [SY]
*Pemerhati adat, sosial dan budaya Gayo. Aparatur Pemerintahan Kabupaten Aceh Tengah tinggal di Kecamatan Lut Tawar.
Baca Juga :
