[Cerite Berbahasa Gayo] Ari Rukah Bur Cemuk

oleh

Oleh : Iwan Kenangan, S.IP, M.SC*

Pemulon ku tulis wan kertas si poteh, male mulokes kekata buge ngok ken manfaat ken kite bewente, den ken kekeberen puren ku generasi penerus. Sesara kelemen ate macek bimang terbayang kisah singe berlalu, ara ejer mu arah, ara do’a sempena, ara mien angan kasat buge puren terwujud ni niet.

Gere mehaten bang kase ara tersiret terlanjur lepas kekata si gere layak orom sumang si opat, orom ate ikhlas kami tatangen jejari sepoloh, sebelas orom utok kepala kami muniro maaf ku kite bewennte.

Sekiter tun 2006 ike gere salah inget ni kami i bulen lime (Mei), sikerna male berangkat ku ranto, male mununtut ilmu ku negeri ni jema, male munentong donya ni Tuhen si gere penah tebayang.

Pien-pien ingi ama orom ine galep pekekune kusi die maksud den tujun ike sediken muranto sikerna male rap lulus ari Madrasah Aliyah Negeri. Terucep ari bibir si gere bedeku delah si gere betulen, ike sediken muranto kenak ni ate gelah mujarak pora keti lues i engon denie den ilmu si male i perah buge ara manfaat e ku ra’yat si dele.

Singket ni peri, si kerna nge male-male dekat waktu menuju ranto, beta nge kene hukum orom eted, gelah besinen ike male beloh bareng kusih pe keti enti macek pekeren karu si tareng wan batang ruang. Sebelem Ama berangkat mumerah rejeki I manat ne ku kite “wen porami belohpe ko dediang ku umah ni awan pedehmu”.

Gere penahhe beta manat atau rintah ari ama soboh oya turah kami turuti selaku anak. munuken pintu mungenali keletek ken lapis ni saka. Kami atur langkah orom bismillah buge gere muhali seli semawah ku tete gergel ni awan pedeh. Sekiter lime puluh meter ari umah ni awah kami engon anan orom awan kunul peserme i arap ni pintu, becerite reronne enta sana si cerite.

Sentan sawah kami mungucepen “Assalammu’alaikum” i jeweb anan orom awan “Walaikumsalam” kami kunul i samping ni anan i arap ni awan. Ari si ko geh kene anan, ari umah kami mujeweb, dele pengunen ni anan orom awan ku kami tentang keseharien den tentang orep-orepen waktu oya (koro).

Entah sana simale i sawah ni anan ku kami sampe awan besinen sejep aku ku kede, mungkin gere tererahhe kami bermenye ku anan atau mungkin kerna ara si tentun awan ku kede. Geh kene anan ipengen ko keta aku berperi, buge ngok munatangen semangatmu ken manat ni kami awan orom ananmu.

Iceriten ni anan kune mungenal penuripen berjujung bako, berjangkat utem, mungenal ongkosen mulo keti mubeli oros orom gulle. Geh kene anan “Ama-amamu, orom ibi-ibimu dele wen, nyanya keti temas sempit keti lues”.

Simale kusawah ni wen tentang kami awan ananmu si pedehhe si male ku ceriten amamu, keti ingeti ko gelah idesiko untungmu keti buge puren nasip mu mutetah, gere nyanya kami berseseren orom berlongoh. Amamu jemen waktu masa bujang e payah pora nasip e, sekulah gere i osah awanmu nume kerna gere ngok ngenal ilmu tape kerna gere tebelenyi kami.

Cumen amamu naru akal e, munengel ku ume ni jema, mumangan ongkosen munyuen bako orom kupi ken benyenye sekulah. Sara masa mungkin olok bang ues ate ni amamu tengah mungoro kami i ume rukah, kumu kuen munamat tali ni kude si mumerjaki tanoh simukokol kumu kiri e namat buku tosse tengah munapal, sampe gere neh engonne kude musier mumerjaki patal si tengah i terlis awanmu.

Igeralung ni awanmu orom tanoh cak sampe lutak salak ni amamu, i redenne mungoro i saponne buku orom salak ke si kona tanoh ledak. Awanmu keras mudedek ari ama-amamu, ibi-ibimu, tujuenne memamang buge puren mujadi jema. Gere ara mulebih atau mu beda tige beles ama-amamu orom ibi-ibimu bewenne des kami pananng.

Amamu gere patah semangat tetap beluh sekulah bier dele si hedepie, soboh renam ilen amamu mungemeken time beluh kutelege munisi keni orom buke. Ulak sekulah menarangen igu orom penengelen murai kude si betemet male beluh munengel i ume ni jema keti ara belenye orom biaya ni sekulah e.

Mumenge cerite ni anan gere terasa luh ni mata nge mubasahi pipi, samung ni anan mien, memejen amamu munempuhi awanmu munyuen kupi orom bako mejen rintah bewenne sawah ku toboh e. Mari asar amamu nge murecaki utem i susun katan sengkaren oya kase ken nemah ni anan berjangkat ku kede i juel ken tamah ni belenye buge dapor si lebuh orom keleleken tue mujebu asap orom rara.

Kenge kumagrib nge rempak kase ari ibi-ibi orom ama-amamu baru i edang pingen lengkap orom batang edang e, sara jema turah sara tokot bandangnge gere ngok lebih maklum masa oya munyanya pora keadaan te wen. Dele si kami demui caci hine, dele simen si bergalak ari kerna munengon kune nyanya susah nyanya e. Nyanya masa jemen kenak ne enti sawah kona kukam besilo wen oya keti turah lepas ko munimang denie orom akherat wen, berusaha orom berdoa oya silebih utama.

Sikerna ko wen male beluh muranto, gere mehaten kase sawah janyi, ini nge luah kami orom ko, nge kami ceriten sejarah ni ama-amamu orom ibi-ibimu. Cerite ni anan olok pedi dele, orom ate ikhlas nge kami restui ko wen beloh muranto buge sana si ken angan kasatmu terwujud ni niet, do’a we ari kami kebermu pedih sawah ku kemiringku kene anan.

Gere tertehen luh nimata kamipe munyalami anan orom semah sujud besinen buge kase kami lepas mujadi daling kolak ken seserenen orom pelongohen. Betetah ulak rasa-rasa e beret mulangkahen saka, orom ate si repuk, pipi si basah orom luh si remenang, i wanni ateni terpahat manat ni awan anan turah kami jege buge puran gere ken kekuah gegeh orom usaha ni.

Masa ku masa sawah kami ku ranto, i tetah bang cara keti beteh kemampuen diri isi ara silep orom lupe ngok bang i tetah sebelum sawah ku masa tes demi tes. Nge mubilangen ulen kami i ranto ara sara ketike munginget ken kekata ni awan orom anan ike wan ranto bewenne sudere bewenne pong kedek, si mehatte kami i tanoh tembuni biak sudere pong mongotmu.

Tes demi tes i jeleni orom do’a ari awan anan awan ine sudere bewenne, nge ilalui, akhere lepas kunul wan bangku pendidiken, sesara angan kasat ni kami orom cita-cita ni awan anan ama ine nge kami lunesen sara-sara. Wan ranto gere lupen keber kami tayangen ken anan awan ama ine biak sudere manat-manat si selama ini nge i sawahen masih terjege wan ate.

Susah orom payah e i ranto bewenne terjeleni, beta we muri i donya bewenne ara sebeb orom akibette.

Ulen berganti ton orom ijin ni Tuhen, sempat ilen anan awan menengon kami munyuepen hasil alak ni kami, rasa-rasa e pues batinni munerahhe. Tikik sawah ni anan orom berakah e “lagu lungi rasae mangga si emah ko ni wen dari pada si ku beli mane”. Mumenge laeng ni anan nge genap semangat ni kami kire e nge meh lunes angan kasat terujut niet. [SY]

Comments

comments

No More Posts Available.

No more pages to load.