Oleh : Wienku Genantan*
Tetok gere berutok, sikit gere berusi. Titok tunin ku kampil, te ke bako keta iwan cerpa. Bako si musurin i tuhi uren oya le si kin sugi. Renggali i perin ne bunge belangi rupen tajuk nilem si i peperi. Sergakni cerak kuduk ni empue, te kerupen tujun ne boh kati mubelah bersi.
Pekekit ni ate kin emus ni kuyu alus sawah ku kemiring, emuse alus lagu si luwis di mejen rasae. Ituhen tibuk ku wan ni berawang male munengon betul ke ara gule we, munengon ruem lagu si kul pedi ujut ni gule we, dedik e tebuk, terupen keperas orum cilek begen.
Batil kerenem pirak tembege, ton ni konyel, pinang, kapur rum bunge lawang. I bungkus orum balut upuh kerawang, barang si nge i kaji dabuh miyen i terawang, geh ni palu wan umah nge bebubung, rering rum jendela pintu pe nge ipasang. Ibarat empus empus nge lapang dabuh geh jelbang.
Sudere urangku si musarak renye megah orum edete, isi nge keramat mupakat behu berdele, isi nge nyawa musara nanguk nyawa nggeh kene si musara peluk, te sana kati si kerna mas pirak besiewiten, meh oya besitipak dagun pe i bueten. Jejari teruluk turuhen jema, te ke rupen si dele we ku diri.
Lomes wan jema rami, cecengisen ike nge mutompuk rum sesabi diri. Isi nge keta si perin ko mutertip ni jema ike ara mukemel i atan diri. Ngemi oya enti dalih inyatai ko sana si wan tenumpit ni jema, ugah ni jema dem si peperi, te rupen ugah diri nge jeb sagi. Nge!!!, nge!!!, nge mi oya, agih si belem.
Toke rum moge, nge penanti sagi ni dedisen.
*Penulis adalah Wakil Ketua 1 Majelis Adat Gayo
