Oleh : Quadi Azam*
Alas ke pedenang, pingen nge beredang. Langkah ini kite mulei cerite ari weh si relem, gule gere neh teles. Ari olok ni denem, hek merahi jema si berpendirien. Ari langkah si lisik, sawah ku seni gere neh mubisik. Edet si ter uken, seni nge ku ralek, kejep mi kadang osop ku toyoh bumi.
Wan oya dor kite mulelawi, nyanyien tetap des, cumen lague mubeda. Si mumenge pe mejen ipaksa, kena ike gere ara, tereh gere beteh jema. Jemen seni enti le oloktu teles kam wen, kene bebujang tue. Jemen leng si we ara, nguk demu, te makin telas salak, gere ke nosah diri. Dem terehe le ya, nume lagu seni.
Sentan ipikiri lagu nguken jemen tengahna, si becerakpe gere dele, kena nge sunguh we pane. Seni nume soal pane, sahen si nemah cerak, keta we seolah mah silsilah. Sahen si mulepas laeng, keta lagu we si muara orom mpue donya. Gaep sombongen si seni orom awan jemen tengaha.
Juge ta ipraten, si nemah leng gere penah datar. Laguepe mejen tuk sagi, kuen ku kiri. Iperene, ama/inengku bebewene, seni kami gaeh ari gaep, munetuk laing ku ate ni reje si mutuah ni. Katinti bage nowe buete, gelah kami becerak atas ni mimbarni.
Sebagai telangke kamipe turah keras, so jema gere moros, mongkos, orom gere pas sekulah hanati daten kam. Wan tun ku tun oya dor peceraken.
Umet pe seni berfikir, pake ni sebenare ngune? Mejen mubela, gatine sengap. Apalagi ke nge demu orom jema oya, nuh tengaha sawah nerima pakea wan mimbar, dele kebere. Yah betul olok buet ni telangke ni, selo ketane mubah ini. Berakah wan pengerjenen ine-ine, sesire mujerang.
Beta si kupenge, sebeb nge dele memang si dekat nge murapat, si gaep geh murekat. Sipane keni ulak, ujunge mujuel cerite, kami ni le penerus bangsa kene, te gere mubuet, ke turah opor tekek, Ike gerepe dele. Iyah betale hamake buet ni telangke mejen.
Ulak mien kite ku cerite ni pengulu jemen. Waeh ikona kuatan ume, nume kena aturen pelen, tapi kena kesadaren beredet, oya kati ara kejurunbelang. Seni turah mepat munerah sesi mara sesi bele, kati jema gere kune kenak. Ike nge mujadi telangke gelah selese, kati umet pecaya, kam rupen jema jeroh. Kena reje si seni kebere jago nekik orom nosah pakan, enti kahe kam kona.
*Penulis Adalah Alumni IMAGA
