MAMPAT
Syaer karya : Tgk. Mudekala
Telah berkata Nabi Muhammad, munerangen mampat ku manusie
Sungune denie oya periesen, ken gegalakan ni benne heme
Si lebih jeroh ilen periesen, oyale jema banan si saleh setie
Betale terange cerak ni Nabi, ku laki isteri jema si nge kerje
Mudepet untung irasa rawan, apabile banan sales setie
Arti sales dele macame, urum suami-e gere mera dewe
Munanto ate munimang rasa, ke sidah pe nyanya lagu si gere
Kediken rawane mudepet susah, nggih osahe gunah i wanni dede
Bier sekidah bele si geh, banan si sholeha munyenang ni kekire
Ateni rawan nggih osah karu, oya kaum ibu si lebih mulie
Alus budi jeroh tebiet, kuet ibedet siep sedie
Nyanyani rawan gere iseseder, gere iunger-unger gere icerite
Oyale banan si perin Nabi, ke padik denie ni we lebih muharge
Oyale keta sibernama isteri, geh kene Nabi periesen dunie
Wo arape mien tebietni banan, si nume periesen atan denie ni
Si lebih kotek ara opat sipet, oya gelah inget ko kaum isteri
Si tunging buyung sipet pertama, ke sidahpe reta rumpo penadi
Ike kaya rawan atewe galak, ike rawan palak atewe geli
Sipet kedue si kipes bayur, asal desar desur we galakni ate
Kin suamie gere beriro, asal gilep serlo we si pikiri
Sipet ketige kedidi paya, gere penah jenta muniti bumi
Kuatas rawan we gere beredeb, silep sekejep nge lagu kedidi
Sipet keempat dedawan lipet, musamut suwet murah pedi peri
Pora pedi cerak ari si rawan, nise lebih simen naruni cahi
Kediken rawane ara berhutang, renyel murip gasak i bilang jejari
Pedehal utang mubeli upuhe, utang ku toke gerilen ejelasi
Disalin oleh: Novarizqa Saifoeddin*
