(Satra Gayo)
Si kedeléné manuk si peralai jema oyale kukur. Ike kukur galak keta nguk isabung, ijalu. Keta iaran taroh. Mera wé raie taroh a ne ku sepuluh ribu, due puluh ribu, mera wé koro atawa kude pé bun jema kin taroh. Dum kul naté, beta mulo kedah.
Menang kalahé keta terserah kunasib, ara kukur galak gere lepas mah taroh, keta talu. Nguk perin kukur ijalu kin pemerah ni nepekah. Gere ubah lagu jema betaroh tekala pacu kude so, kude si musangka ke mujontor délahé seneta, si betaroh keta mumangan sedep, mangan ku pajak rum kul ni kutep.
Si menang a keta nge tetinine ike sikalah a keta pukekucip, pupeperus gumis, nomé kelam gere né mis, péng wan béb nge méh titis.
Sara macam mi keta gere kin kukur sabung orop nge iperalai kin lelon kin dediangan, igegenéng, ipepanang, ipeperus, ipenirin dum galak naté. Iyo soboh iéngon-éngon, ikertéken pumu kukur pé mungku, tuke mulapé lagu si nge korong, osop gerahan basah gerngong. Ku sibeluh oya kin téméngen, beluh ku empus atawa ku rebe, si gerepé udah keta ku mersah atawa ku mesegit.
Sentan soboh dabuh mencér matan lo cap renyel iuetan rungang beranir-anir bergegiring, isantiren ku tetulok itatangan pora tetemas pecengang, ileweni lagu becerak urum budak. Ikumuren wih isempuren ku bedené, ipeperus sire wé bejunté atan jejari pumu kiri, ikertéki kin pumu kuen. Kené paké a iejer mentalu.
Kenge porak kasé o ayon ku wan rungang igenéngen isantiren ku cabang nasam, ku labang sagi rumah tuyuh niteroto. Anak dirié pe kadang ipenirine sana kené jema banan. Lagu si gere ara lupen sejappé, betale kul naté. Kukur mentalu, até galak, kukur mungku nguke isimak, mangan sempat lupen, utang ku Tuhen gerené beriro.
Kenalamen ara kin regge ni jagong pakan kukur penan ni kumpu barik enti mi. Ulak ari empus atawa ari ume, cube mi ingetti kune kin cara ni paké si bekukur a. Dumna gureé kadang te ara uah ni kupi ben kutip wan karung, keta katan ulu renye ijujung, kadang batang ni peté atawa cabang ni kayu kédah malé kin utem atawa kin tersik kin tiang ni penjemur nupuh, keta katan kerlang dabuh iarang parang pe iteméng ike perlu anak pé iemen mien, ketanné kukur wan rungan mien itéméng kin pumu kiri.
Sengkiren urenpé lo buet lagu noya gere muketapi. Kite mi we munengoné lagu si nge sawah dehdohé. Kune kin kinen muniti atang mulengkahi atang, munéki kité ike dené jeral gere biké mukelset. Muniti petal pé gere mukekunah, sengkiren kedang malé musentat, adik kukur a né mukunah, lagu si nguken anak si wan nemen a né mutuh. Beta séba jema ari kul naté mununung galak, lupen wé kin téngkéh ni jema, arok mupolok galak muselpak.
Kati kite paham kukur ni lagu si ara roa macam, pertama kukur si sediekala kite égon iperalai jema, kita sara mi kukur gunung. Lagu si ara ilen sara mi, si begeral merbuk kire-kire bensa ni kukur. Ke kukur gunung lagi si mupenilang pora jangutté gere olok iperalai jema sebeb gere kita betih sanahé si paral. Gere lagu kukur pedih ne betami kena, lénge iparal, gukké pané mentalu, keta kin pengantin bun jema ike munama aring, munama getah, munama katir. Kona ni kukur ari guke beta kené téngkéh.
Boh pengén gelah jeroh, keta ni kekeberni jejok. Jejok ni ara si bergeral jejok balu, jejok ines, jejok berbakan, nta jejok si gati kite egon terbang-terbang atan tamas, ari batang ni anar ku batang ni béké mengenal iyok mumangani uah. Entah si si jejok si tulu ni si peralai jema mal regeé pe, lagu si jejok balu, lagu si berbakan ke die gere selésé tu aku.
Tapi ara, jelas jejok. Ke jejok umum a ne te, lagu si gere iroi jema, suket tukang letep. A biasaé nantiné lo uren mulo. Mari uren a nge sidang beta kedah baru beluh muletep munep-nep tuyuh munem muah.
Jejok si peralai jema ne ikekus delahé urum mas kati pané becerak, lepas itunungé iuru-urué sana si gati pengewé cerak ni jema empu numah a. Miselé berpepiulen, gure asal mumengéwé, lagu tiung pé kené jema lepas lagu noya.
Jejok gere ara ijalu jema lagu kukur. Iperalai bis kin lélon we. Lénge iparal. Ike si galak a kédah tekala géh kite ho renyel wé muling seulah-ulah kin pesalamanné. Senang aténte. Pakané pe murah we, awal tasak, pertik tasak, lede pentek, nguk perin uah ni kayu. Cume citnalahé pengalut ni jejok ni oyale, awahé mumangan, keta crét crot teié pé renye tangkuh, lagu si redik di. Buh jema kin pengaluten enti lagu jejok, crét crot sesire mangan.
Tah mumangan kuwih kul. Jadi ke beta ya pede serlo, beluh mi we kami ku empus i Paya Tumpi. Nge beta bang pel’oh ni manuksie ni, uru-uru. Berempus jema berempus aku pé, bekupi jema bekupi kite pé. Ke makin tekala kupi murege, munengon jema si bekupi a mubeli gulé ku kedé sentan ulak so nge betemengen iken pedih mowa-owa atau hondaé. Murip nesunte pé, bekupi mi bang kite pé dabuh mengas, gere ninget kune kin keberni bawal merges.
Jadi ni kami ne wan empus a ara kupi, ara asam kelélé, ara awal, ara nangka, ara agur nguk perin lengkap. Uet ari umah bangun si nge sawah sunguhe sentan sawah pé ku empus negon kerpé nge sejenyong kite nge apus kupi, dabuh sabét. Itebesle pora-pora irerampis. Kané ananmu, ni kite sibetulé delé turangkammé buet ni, ujudné pemariné kebatangan.
Gere ara buet si ucus bené mupuyuken. Létu cabang ni buet. Gere tededik. Engon ku kerpe lagu lingku mulo ne nge apus kupi, cabang ni kupi gere beserlak nge mumah ni musangen. Opos umah nakalku, lagu si gere terkekiren naku né si de si mali kumulon.
Dang-dang pubebeta nge atas pé lo, buet gere ilen murupe, gere ilen sanah pé temungenen. Dosa lehé nge buet te ni, a kené ananmu. Kune dosaé kenaku, lagu si nge malim di. Sana si gere dosa, reta gere itetahi iluah jaluhen pelin gere bertentu. Gere ubah, amanah ni Tuhen gere iperalai ke lagu ini sakit ni ling, lagu si nge datén mubazir. Ibarat ume lagu si nge beseje irohen, empus ni beta lagu si malé italun.
Lo pé rerenyel ruhul tuke nge dabuh mulapé. Tekediren ananmu nge mujerang. Wé sesire mujerangle becerak ari wan jamur isutié léngku. Ko kini mi keta mulo renye mangan, mutalu ananmu ari wan jamur. Jadi kami ne beluh ku empus gere ubah lagu minah mangan pelin we. Tekok di kite nguk sedep di mangan i empus ni mangan pelin we.
Tekok di kite nguk sedep di mangan i empus ni. Gere dalih berpong kero. Rebusen rukut, pépésen lede, terasi tikik buh agur kemero anconge, cap célét ku legen a, lagu si gere tegilahiné, gemok silente, sesara kemul ku was, lagu nege munelgap, bet-bet lukup suepte. Meminter nge boréhen. Pora museré kunulte genyuren kédéng dabuh poap-oap geh tunuh. Ike itunungen renyel mujadi.
Tengah kami mangan a ne, tenenge ling ni tung-tung i umah ni Pak Serun. Sana die mien oya. Kupené pe Pak Serun a munalu kurike iguel tung-tung, meh temabur bersangkanan kurik-kurik si bejamah wan empusé a ne ulak kumah. Kupen beta jep ruhul kurik a ulak mulo sejep iosah pakané jagong isempak atawa kacang kuning.
Mari mangan a ulak mien dediang bejamaah mumérah pakan wan-wan kupi a iyok, kerudik, lompong, kétol, sanah-sanah. Yo kasé muling mien pukul-pukul 5, a tene ulak lup ku wan kepuh nomé demu mien mangan.
Si kin pikirenku nume sana nguk betéhé korik a pe le ling ni tong-tong a ne heran aku. Nge mengerti.
Dup kurik kenaténgku nguk kupen iejer mera taat. Sana kati manuksie mera wa cules gereke beta ya, semiang soboh so ingerti kopé, jema azan nge jep sagi bertuken mantong sempat ilen, pora-pora mi petetowét singkih kuen balik kiri, upuh jebel pe ikelkupen mien. Arake patut. Olok bantat manuksie ni. Lagu si nge patah ejer.
Nge mari semiang gere nasup né mumebes. Nangkap asam mi we kin nemah ulak. Kemana uah nasam ne ara jarang-jarang. Aku munik, ananmu kukeni mungamul. Sesara keranyang beta nge engkip-engkip so kuturunen betali, lagu munebuk wih ari wan telege.
Nume tetine kupi nge royo buh kerpé, keta asam ni pé lagu nge jep cabang mukayu malu. Sesire munangkap uah nasam, enta ke kumulon munetuh. Munetuhi cabang nasam si mukayu nalué. Bengis ananmu dabuh mungeléméng, sana kati asam a itetuhi, sana kati cabang nasam a si tetuh. Enta ke gere cube pé ipikiriko kune mununuh kayu nalu wa.
Wé murip yoné murum muyet ku cabang nasam a. Ningkam a kati buet delén sie-sie, gere ningetke kam kin cabang oya tengah a muah delé ge mutetéwah nge museléwan, enta se ni dabuh itetuh. Kena nge gere muah né betake, a ling nananmu bangun si giging. Ke gere kune keta mununuhi kayu nalu ni kenaku, aku pe lagu si nge okéng, turuhen kam pé. Gere ara jelen lén nge turah itetuh cabang a pé kunehen ara nguk. Tengah a wé muah se ni gere né, te nge pelin kayu nalu.
Salah di kam. Sa salah, kenaku mien. Kam salah, kite nile salah kena kite empu ni empus a kite empu nasam a. Tengah kucak kayu nalu a cube tetir renyel iunuhen ke gere dalih urum cecabang nasam a pé renye turah murelas. Cit ni reta gere berurus. Sileple kam oya, kenaku. Kite gere salah. Ipikiri gelah jeroh. Cube ingeti mulo ari sihen kin ralik ni kayu nalu ni. Sa munyuené. Sana kati dalih atas asamte a murip. Ku kayu lén so mukune atawa katan bumi a lues ni denie.
Ke lagu oya kekire perin jema pe kite pekak. Sa nyuen kayu nalu, selo ara besuen murip dirié. Ke gere tetine atan asamte ni, ni jema len so pé ke ara. So atan batang nangka, so, atan batang ni temung so gereke nge oya pelin. Gere ara pe ne nyaris ulung ni temung a teridah. Cume ni jema asamé betetah, gere idatén mulumut lagu gere berempu. Pedehal empué jema makal. Ike becerak urum delé ni cara, buet gere orop sih pé.
“Yah, kune ling a ya, lagu si mugeratak di le.”
“Enta gereke. Kite jema makal. Biak si remalan ter mulo, kunul ter uken. Si mungajin kenduri wan jema delé so. Ale lalé munetahi jema delé empus diri pé gere né beriro. Inget kamke didong ni Kebinet, lalé aku beketor meh jongor selap sané oyale kite. Réré jantar pengate.”
“Ahal jejok nile si munos lagu.”
“Sana kati minter musalit ku jejok, sana nisé.”
“Jejok nile si jahat gere medet gere mubetih kemél, gere betehé buet melarat ku jema, lagu si kenak diri pelin.”
“Sana pulang kati ku jejok mempas.”
“Ari wé geh ni penyakit.”
“Arake patut, lagu si gere pan akal.”
“Kune gere, jejok nile si jahat. Wéle munemah inih ni kayu nalu a ku jep-jep batang nasam a. Pikiri cube, gereke kasé betul léngku ni. Jejok a mangan uah ni kayu nalu, bubunmi mulo i atan batang ni temung so. Nge mari mangan a ke nge korong nge engkip pogéngé ku jep-jep batang nasam a.
Pikiri cube, gereke kasé betul léngku ni. Jejok a mangan uah ni kayu nalu, bubunmi mulo i atan batanga ni temung so. Nge mari mangan a ke nge korong nge engkip pogéngé, wé temerbang. Com ku atan batang nasamte ni. Uah ni kayu nalu si pangané oya ne iécéngne soné, lekat i cabang nasam a ne. Meh kemokot né sawah masaé renye murip.
A macam buet buet ni kayu nalu. Raliké ahal ari jejok mécéng, pikiriko kune malé mungoa jejok kati enti mécéng katan batang nasamte. Selo bang lepas. Suket itos peger sawah ku langit.
“A kati kenaku ne ke tengah kucak kayu nalu a murah mununuhé gere dalih cabang nasam a pé kona tetuh.”
“Enta ini nge lepas pé mulo murip nge kul. Kunehen né ara nguk. Suket jejok a itatar mulo kati enti mécéng ku si kenak gere betihé kenyanyan jema.”
“Si rerume si gere pangan akal sana si ucep. Manuk, selo bang ara kekireé si mujadiné. Manuk geralé pé selo betihé wajib mutempat warus barang kapat. Ike manuksie ne lagu manuk a nguk perin lagu jejok a lague perangéwé, mampat perlu itatar. Ke mepat bang tempat ni perécingen, gere nguk ku si kenak gere mupereturen. Si lagu-lagu noyale si turah mepat parié. Gere bang ara manuksie ni si rejen lagu jejok a.”
”Kul pengepak né tei ni jejok ni kupen.”
*Disarikan dari karya AR. Hakim Aman Pinan “Bunga Rampai Cerita Rakyat Gayo, Seri IV. Departemen Pendidikan dan Kebudayaan, Jakarta: 1986”.
