Oleh : Abdullah M (Gecik Tue Mongal)
Alat ni mangas pengén kucerite
Kadang te ruh kadang tegere
Cube i simak osudere
Keta béwénte mulo kite surah
Bebalun berukir tenaring ni tetue
Batil kerenen kuningen tembege
Turah i emah iwan mungerje
Tene mulie kujamu ben sawah
Sunguh ke titok nguk gere sesilon
Urum lusung atu wé berulon-ulon
Ancur nge lumet lagu si inyon
Nge tetine perlon tetue joyah
Miyen kelati kusi gere mipon
Kin penggécépni pinang wé kite bobon
Iwanni kampil nge mulelempon
Tapé bebakon le ninsé kin umah
Pinang juli kin mangaste ménét
Kepinang gunte i tunu berémpét
Kepinang mude rasaé kelat
Mejen kona két nyan baro mupecah
Konyél si ilang le ari menderet
I wani uten bedirin kuménét
Tinih betinen kutungul berémpét
Tebel lagu jékét oya sitetengkah
Kené belo pedih aku si murudang
Kené belo aku si tumung gagang
Belo uten tampukké ilang
Ketapé terpanang ike kin gelasah
Besiloni mangas le enge kin dagang
Begule putih nan bebunge lawang
Lagu begincu bibirmu ilang
Ara jarang-jarang kin penurunmi tuah
Aku sialus kené kapur atu
Kené kapur ketor aku ben tunu
Rasangku apak siken delétu
Ingen bibirmu kasé mucecerah
Kacu si bulet renyel mungadu
Aku si penting nanpé perlu
bibirmu ilang lagu begincu
ketapé aku berasal ari getah
kené bako sugi le aku si lucu
rupengku item lagu ruje jelbabmu
oya sigising tulak urum pumu
perasanku orop munengkipi awah
pemarin pedih oya lusung atu
sampé mekelung suntuk itutu
ara urum besi ara urum kayu
teba nge oloktu nge sampé mupecah [SY]
H. Abdullah M lebih dikenal dengan sapaan Gecik Tue Mongal. Ia lahir di Aceh Tengah pada tanggal 5 Juni 1934. Perjalanan kesenimanannya bermula pada tahun 1948 ketika ia bergabung dengan grup Didong Kabinet yang selanjutnya banyak melahirka karya-karya emas bernafas Islam. Selain sebagai pencipta syair-syair Didong ia juga menjabat sebagai kepala kampung selama beberapa periode, pelaku dan tokoh adat Gayo yang banyak terlibat dalam even-even kebudayaan. Ia berpulang kerahmatullah pada hari Jumat 11 Januari 2013. Banyak meninggalkan karya berupa Saer Gayo, syair Didong, rekaman Melengkan dan kesaksiannya tentang perjalanan sejarah Perang Medan Area, G.30S PKI, DI/TII, Gerakan Aceh Merdeka dan lain-lain . [SY]
