Sastra Terbaru

[Saer Gayo] Jasa ni Ine Ama


Jasa ni Ine Ama

Shallallahu wasallam
Alan nabi sayyidina
Muhammadin wa’alihi
Wasahbihi ajma’ina

Sepuluh hari sembilen bulen
Baro i lahiren kite ku donya
Gere né tertimang sakit ni beden
Buet ni Tuhen turah kite rela

Payah ni ine ama ngaulen kite
Imasa sedenge waktu kucak pudaha
Mumikiri kite nomé gere emis
Kire mudais orom anak ni jema

Shallallahu wasallam
Alan nabi sayyidina
Muhammadiwwa’alihi
Wasahbihi ajma’ina

Isi kin uten nge emeh i rintis
Suen kacang buncis kin rege ni poa
Gere nguk kona porak gere nguk kona sejuk
Iemenen ku kuduk enge moa owa

Géték pucuk ni jepang géték ni taruk
Kadang kasé enguk kin rege ni pena
Tenement i pumu jangkat i kuduk
Uku mugelduk gere né terasa

Shallallahu wasallam
Alan nabi sayyidina
Muhammadiwwa’alihi
Wasahbihi ajma’ina

Sekurang belesen ku jema
Enti kite dewe iwan rumah tangga
Enti laing sakit tangkoh ari awah
Kegere pé benemah kadang gere ara

Umur gere lanyut rezeki gere mudah
Gere terime ibadah ke anak durhaka
Nge kejadin i masa Rasulullah
Bergerel Alkamah i masa pudaha

Shalallahu wasallam
Alan nabi sayyidina
Muhammadiwwa’alihi
Wasahbihi ajma’ina

Turah i suit kati beluh kesah
Gere baca laillah malé beloh nyawa
Ke kin jema tue gere kite hormat
Gere kasé berkat reta si ara

Renyel mu tutup kasé pintu tobat
Tuhen mulaknat gere berampun dosa
Tamahen mien i benci malaikat
Kite ijerat kukekal ni neraka

Shalallahu wasallam
Alan nabi sayyidina
Muhammadiwwa’alihi
Wasahbihi ajma’ina [SY]

*Dipetik dari naskah lomba Saer Gayo Organisasi Forum Silaturrahmi Pengajian Ibu-Ibu Kecamatan Lut Tawar (FUSPITA) Kabupaten Aceh Tengah di Gedung Olah Seni (GOS) Takengon, pada tanggal 16 Januari 2019. Dibawakan oleh Kelompok Pengajian Al Muslim Kampung Asir-Asir Atas.

 

 

Comments

comments