Sastra Terbaru

[Saer Gayo] Kolusi Korupsi Nepotisme


[Saer Gayo] Kolusi Korupsi Nepotisme*
Oleh : Aman Jul Arita

Melalui didong le kami berperi
Melalui seni tikik ku jelasen
Ku tiro maaf ku abang rum engi
Maklum délah kami si gere bertulen

Si kite éngon nyata ora kite kaji
Si enge terjadi oya kin pengalaman
Ara tulu faktor siperlu i teliti
Ini kugenerasi cubepé i renungen

Faktor pertama si perlu i betéhi
Gerale korupsi ike nguk i kurangen
I suket béwéné i tuang ku bebuli
Téba wan jejari lekatni manisen

Ike buetni tikus gerené mukemali
Sampé wan lemari barang bekas itasonen
So bujang kemara gere né bertetabi
Tempaté bertari iwan tung beberasen

Uruten kedue geralé kolusi
Gere né tersembunyi enge mepar pasaren
I tuyuh ni map amplop berpari
Ike gere kuisi gere ara harapan

Ike pakan itik sawah lime guci
Baro kite arai keta sigule iken
Simulo kusuk arap tunggu jejari
Sawah roa bebuli minyak perurut beden

Faktor selanjut e uruten ketige
Oya nepotisme siturah i osopen
Ike mangan sedep turah sara ine
Ke sara matanlo kin peningoni pingen

I bubun kin sepir anak sulu bere
Si merah siwe pemén ari Biren
Si turah kin kenep so Kemara Mude
Karena wé temude si olok ringen tulen [SY]

* Dipentaskan di Gedung Olah Seni (GOS) Takengon pada Acara Puisi Menolak Korupsi (PMK), 13 Mei 2017

Comments

comments