Sastra Terbaru

[Syair Gayo] Telasmi Kire Si Temuni


Oleh : Ayu Mentari*

Getar so laing si temuni
Munalu ulak kire rembegeni
Mulangkah jejak ari sara ruang
Munaring iket si nge besemet

So rues si nge mubayang
Muterterbang kilet kin peregang
Munaring ama wan tengah mujelbang
Menaring ine si tengah putetimang

Langkah ni kédéng si kurasa tiwel semelah
Kadang susah muging langkah si semakin hejep
Aku sesuk wan tanoh si jarak
Lagu musesurak mutalu so tanoh asalku

Oo Ama oo ineku
Hejepmu singe gere terbilang
Buge mujadi sara cahaya kin penguet godaan
Terkadang lagu gere sanggup aku munuke so kertas putih
Lagu mugegir pena si kuamat
Cumen, langkah pemulo aku nge bersumpah
Aku i ranto buge ulak munemah bahagie

Ari jarak aku makin mengenal so tenege
Mulangkah jejak aku, kati pane remalan bier wan gelep
Walau hejep turah ku ralanni

Ama…ine
Kédéng si mulangkah até si sakit
Luke rom letih gere ne terperin
Mata si terang nge musesamar
Wan bise terbesit tulus rom senyunmu

Mulangkah aku iwanni sumpah
Wan hejepku remalan wan ruang ayu
Alak si megenang buge pas kusapu
Letih si ara buge pas kutetimang

Deso ni kuyu munemah keber semet sebukumu
Temuni sebuku wan peri menujer
Sakitmu gere terbaca aku
museltu aku langsung remenang lauhku

Regang ditali buge gere renggang
Punce é buge sawah munemah senang
Wan puser ni ulu angan rom bayang
Sawahmi kire si i tuju
Telasmi kire si temuni
Demumi kire si nge osop
Dekatmi kire si jarak

Ama ine ku
Ini aku anakmu iwan jarak
Mengenak ulak cumen gere pas len munemah galak
Berizin berserah aku kin restumu kelak
Kin bedik sesuk kuet tenegemu sergap [SY]

Bener Meriah 17 September 2018

*Ayu Mentari, lahir di Blang Sentang pada 10 Juli 1997. Alamat: Dusun Kayu Beriring, Kampung Blang Sentang. Kec. Bukit. Kab. Bener Meriah. Menulis adalah rangkaian dari keluh dan kesah yang terukir dengan gerakan pena yang menuangkan kata berbaris kalimat.

 

Comments

comments

Leave a Reply

Your email address will not be published. Required fields are marked *