Free songs
Home / Sastra / [Syaer Gayo] Perjelenen Muripku

[Syaer Gayo] Perjelenen Muripku


Oleh : Fathan Muhammad Taufiq

Muninget aku kin masa lalu
Lauh remenang mujaril ku dagu
I Ujung Karang soné jamurku
Atan pematang simu atu-atu

Kuburen Belok oya denéngku
Mejen musentat mejen museltu
Gere tebetih nyanya ni muripku
Beluh muranto mungenal ilmu

Soboh renam kurik murungu
Munosop sejuk sesire muniru
Jelobok ni waih tene mesiu i jerangen oros kin mangan sobohku

Paong kero gulé masin tunu
Rum lede polok oya si gugu
Orop misi tuke gere mukuyu
Kin peneger semangat urum langkahku

I pucuk ni baur soné tungkelenku
Gaip ari ama inengku
Kerna sara we si malé ituju
Beluh sekulah ku es em a satu

Alak mujaril mubasahi beden mejen wan porak mejen wan uren
Murébék baju murobok sepatu
Beta nyanyaé mungenal ilmu

Nge mupuluh tun oya berlalu
Kerna ara tikik mutaling ilmu
Nguk demu buet kin tukang sapu
Sipenting nguk munuripi keluargangku

Besilo syukur ku Allah Tuhenku
Ara mutetah pora nasipku
Ike kin kaya udah gere tentu
Tapi munyekulahan anak gere né nyanyatu

Oya le kisah i wan ni muripku
Kusederen ku rakan sebet suderengku
Kati nguk kin inget-ingetku
Turah berjuang ike kenakan maju

Bierpé béwéné nge mokot berlalu
Sabé lekat wan ingetenku
Kerna oya perjelenen muripku
Dakku sélohpé gere telupen aku. [SY]

Bur, Ujung Karang, Oktober 2017

 

 

Comments

comments

Install Lintasgayo for Android Smartphone

Leave a Reply

Your email address will not be published. Required fields are marked *

*

Scroll To Top