Bag. 1
Prof. Dr. H. Tgk. Baihaqi AK:
Malam ini tanggal 26 April 1976 yang bercerita tentang sejarah Gayo yang disampaikan oleh Tengku H. Ilyas Leubé, seorang ulama dan pemimpin, yang banyak mengetahui sejarah Gayo, perjuangan Aceh melawan Belanda, perjuangan Aceh menghadapi Jepang pada masa revolusi kemerdekaan, kami persilahkan.
Tgk. H. Ilyas Leube:
Assalamualaikum Wr. Wb.
Kelamni terbilangan si jeroh orom ketike sibise, aku memperkenalkan sejarah Gayo ku urang Gayo. Teringet aku kune penténgé boh kite betéhi sejarah ni perjuangan ni awan-awante pudaha kati kite betéhi seni harge dirinte, sesuai urum kata-kata hikmah:
“Gere akan rugi, gere akan hancur sara jema ike jemaé ibetehié harga dirié orom derejet dirié “
Untuk mumbetéhi derejet dirinte dan mumbetehi sa kite sebetullé urang Gayo ni harus kite betéhi mulo sa awan, kune perjuangenné kune asal usullé, baro kahé kite betih kite seni mubétehi sejarah niawan-awante.
Alhamdulillah kelemni terbilangan sijeroh orom ketike si bise, nge murum kite iatan umah batang ruangni si renung ulenni rempak lagu gelung, gere ara lén gunente isien selain mumengé hikayat Gayo khusussé, ike ara mesét daerah Acih ni pada umummé.
Ike kite mengaji sejarah Gayo maka ara i Gayo kerejeen si terdiri pudaha pertama Kerejeen Linge dan kedua Kerejeen Malik Ishak.
Si pertama ni Kerejeen Linge kuceriten mulo kukite, kahé nge méh selesé ceriteni sawah ku ujungé ke ara waktu kuceriten sejarah ni Malik Ishaq atau asal ari Kerejeen Acih.
Kerejeen Linge ni, ini ara dongeng tersendiri. Menurut manat-manat si turun temurun ari awan ku ine ari ine ku aku i Linge. Bahwa Kerejeen Linge ni berasal ari Rum. Lut ilen masa oya dunienteni, géh sara perau ari Rum, perau ni jema sara wan perau ni lagu gunur kené (bulet) lénggé wé i pengé, jema é gere teridah. Ari oné le mulo awal kata-kata “Linge”, lingngé we ipengé . linge , ling ni jema a we.
I Linge pé waktu oya kerpé jarum jemarum, uren renye-renye turun jema lagu gunur nye ijulen ni perau ari Rum, Kerejeen Ruum. Beta kené ine ku aku. Reje Linge yang pertama sebelummé nge Islam, kerna wé géh ari Rum, si sebut isien Rum Turki nume Rum Rome Barat tapi Rum Turki.
Gerel ni Reje Linge ni payah kite mungenalie. Alhamdulillah kerna nge kusapih-sapih ari dengan te Inen Qamariyah, iaran mulo kenduri kené, kati nguk kulingngen gerel ni awanni. Jadi kusapih-sapih, kusapih-sapih oleh Inen Qamariyah isebutté bahwa gerel rejeni geral pedehhé “Reje Genali”. Oleh urang Acih sudere-suderengku i rasie “Tengku Kawé Teupat” dan bahasa Gayo é “Tengku Kik Betul”.
Oya le Reje Linge si memerintah pertama i Buntul Linge. Mukepak-kepak bendera é i Bukit Buntul Linge. Ike i atas bertulisen “Asyhadualla Ilaahaillallah Wa Asyhaduanna Muhammadarrasulullah”. I tepi tuyuh bertulis gerel ni sahabat opat; Abu Bakar Siddiq, Ummar Ibnu Khattab, Ali bin Abi Thalib urum Utsman Bin Affan radiallahu anhum. Warnaé gerené terasi aku entah mungkin warna ijo nge kuning atau ruje a putih, sebeb olok pedi nge mulapuk. Oya le bendera pertama si mukepak-kepak i yup yup kuyu i Buntul Linge.
Reje Linge ni ara opat anakké. Pertama banan i rasi gerallé Datu Beru (nume Datu Beru si ikuburen i Tunyang), kedua rawan gerallé Johannsyah, ketige rawan i rasi gerallé Alisyah, keempat rawan irasi gerallé Malamsyah.
Kaul ku kaul ini anak akhéré sawah masa. Kené datunte pudaha i Islamen, bahasa seni i khitanan, bahasa ni awan-awan te pudaha urum datunte i Islamen. Dengan takdir Allah yang maha kuasa dan si berkuasa awan si tulune, anak ni Reje Linge si lelah ne, wan sejarah Karo disebut “lapan piso” gere pangan lopah, “iolehhi lebeh lalap lapan piso”.
Iulangi mien tetap gere pangan lopah i baba ku batu gundul “lalap lapan piso” tetap gere pangan lopah. I mai kuatan batu gundul i bur ni bukit boh persangkalan “lalap lapan piso” kené urang Karo, tetap gere pangan lopah.
Kemel anak si gere pangan lopah ni, gere mera né ulak ku umah, musangka wé ku uten rime, gere dis nasépé lagu serinenné si roa ne, dan gerellé pé gere I Islamen ilen.
Karena geral mulo ne i Islamen kemél aku entimi aku ulak kené, temuni ku owan uten, temuni ku wan tamas. Akhéré sudere-suderengku Reje Linge dan rakyat é i Buntul Linge, iperintahné, kenali, karoi mah asu karoi. Mah asu ikenali i karo, i tapaki bekassé anak ini mai ku umah i tetegu sawah ku umah iapali ibié, i apali ananné, nasibmu win gelah kunehen enti kemél, niko nge beta takdir ni Tuhen. Enti ko kemél, enti ko kemél.
Tapi perasaanné gere né temas, mangan gere né lulus, nomé gere né mis. Akhéré i tiro é ijin ku amaé urum ku ine i Reje Linge supaya i taringné tanoh Gayo ni. Karna gere dis nasippé urum jema si ara i Buntul Linge .
“Te kusi kekiremu beluh win” kené ama”.
“Aku ama dengan ijin ama gelah aku beluh, ara megah perbatasan i tanoh gip so ama jarak (Karo) gelah bang aku beluh karena jema iyoné dis nasib pé lagu aku ama, gere Islam.
Ta ike beta pé win kené ama urum kene ine,
“Lang murum ko tulunmu opat orom akamu ke nge turah we taringku tanoh Linge ni gelah ku bagi mulo pusaka ku opatmu. Kedang kusi kahé beluh, nge le ara pusaka oya ingetiko. Aku tubuh kuni nge le tue”.
Langna i sagi ni pendari i arap ni sara opat oleh Reje Linge yang pertama atau Tgk. Kawe Tepat i bagi masing-masing anak si rawan khususé. Anak si banan gere mudepet pusaka karena wé ibon Reje Linge memegang kunci khazanah. Wé namat perbekalan segala resia ni Kerejeen Linge.
Anak rawanne we si osahé pusaka. Karena rawanni mera beloh muranto. Masing-masing sara anak rawan depet pusaka. Pertama koro gonok tesaran, kedue bawar tesaran, ketige tumak mujangot tesaran, keempat mermu tesaran, kelime elem tesaran.
Elem ni bahasa Gayo jemen bendera pusaka. Elem ni betulis ike i atas bertulisen Asyhaduallaailaahaillallah waasyhaduannamuhammadarrasulullah i tepi tuyuh bertulis gerel ni sahabat opat. Si depet kite éngon seni elem i Karo. Tumak ne dan mermu ne orom bawar adapun koro gonok gere depet kite éngon mungkin nge maté karna nge berganti-ganti keturunen.
Setelah ketuluné anak ini depet pusaka si bergeral Alisyah niro ijin ku jema tue, daboh muderu. Ama, ine, tutur perananen tutur pedatunen, gere tebetih né mongot. Mungkin gere né mudemu kite, mugkin kiamat mi we kite demu. i julen oleh panglime-panglime begene kude. Ari Linge nye ku sara Bur Kul nye ku Lukup Serbejadi, renye ku Pining renye ku Belangkejeren. Belangkejeren nye kiser kiri wé depetté tanoh Alas seni lut gere ilen mujadi deret, gere ilen muke dené ni wé Atu Gajah mupitet ilen. I lut kucak ni kiser kiri nye sawah ku perbatasan lut ni, i serap so i depetté sara belang gerellé Belang Mudi.
I Belang Mudi ni le pakéni teduh. Kené Alisyah isin dih aku madih i taring ni abang ulakmi kam ku Linge, osah kam kahé keber ku ama ku ine aku taring i sara belang gerellé Belang Mudi.
Oné le taring ni awan te si gere pangan lopah ni taring i Belang Mudi. Nge berbulen-bulen taring iyoné beta menurut kekeberen awan te ni beloh begulé ku Lao Renun. Lao bahasa Karo artié wih. Wih Renun sawah ku geniring ni wih kul i depetté si beberu orom si bebujang ari negeri Pak-Pak tengah munyékot gulé.
Ioné gintes awan te ni, gintes juge beberu urum bebujang si ari Pak-Pak. I salami é mujuah-juah gere te sutti awan te ni berbahasa urum isyarat
“Ari si ko?” berbahsa aku anak anak Reje Linge ari Gayo aku. Urum beberu urum si bebujang Pak-Pak ni le awan te bergaul bersibetéhen muloé nye pané bahasa bergaul, mokot urum pakéa akhéré awan te ni betempat urum beberu iyoné i Belang Mudi. Iyoné awan ni betempat berketurunen bercucu bercicit. [SY]
Ditransliterasi dari rekaman (audio) Tgk. H. Ilyas Leube pada tahun 1976 ke dalam bentuk tulisan oleh;
Tauhid Mawardi, lahir di Bener Meriah pada 10 September 1995. Alumnus SDN 6 Kebayakan dan SMPN 6 – SMAN 4 Takengon ini masih tercatat sebagai mahasiswa pada Jurusan Teknik Informatika di Universitas Malikussaleh Lhokseumawe, Aceh Utara.
