[Saer Gayo] Tgk Banta A. Farida
Kisah Nabi Ayyub
Ini kuseder sara kekeberen
Buge kin teleden ku bewenne rata
Lebih-lebih ilen ku kaum ibu
Si enguk kin tiru selama masa
Kekeber ni Ayyub si kuet berimen
Nge i osah Tuhen ninse kaya raya
Laki istri nge bersenang ate
Sana si pintee bewenne ara
Hartae dele nge tenyen bertenyen
Si enguk iperenen olok terhola
I sara masa tekedir ni Tuhen
We jatuh sakiten gere terperin nyanya
Sakiten Ayyub si benare beret
Ngih terboboh uet ne lagu biasa
Tujuh tahun suntuk i wan sakiten
Tekedirni Tuhen we jatuh sengsara
Banan ni Ayyub nge dabuh berfikir
Si karna nge fakir nge turah berusaha
Banan ni Ayyub si benare seber
Nyanya ururm suker bewenne rela
Renyel we beluh mungenal nepekah
Beluh tung upah ku jema sikaya
Tentang ni buete gerene tercari
Ara kin kuli penyapuni jema
Ara kin tukang sabun ara kin tukang dubi
Asal demu gaji peluah ni nyanya
I sara masa atewe keliru
Buet gere demu peng pe gere ara
Mungenali buet lao pe nge iyo
Male berbelenye ngih sanah pe ara
I yone termenung ulu e petungkuk
Munguntingen wauk i juel ne ku jema
Regeni wauk ibeline ku barang
Renyel mamang-mamang i belinne poa
Lao pe nge iyo ulak ku umahe
Sawah ku umah pe kona bengis pora
Seulah bengis si rawan mungune
Kin sana kati ulak betilo ari kota
I yone si banan bacar ulak berperi
Aku serloni olok pedi nyanya
Mungenal buet gere ara mudemu
Sehingge wauku kujuel ku jema
Sesire bercerak i lekoh ne tudung
Ulue nge gupung wauk gere ara
I sone Ayyub nge dabuh mongot
Atewe gere ongot kekire gerene jenta
Munengon si banan atewe sayang
Renyel semiang ku Tuhen we berdoa
Doani Ayyub i kabulni Tuhen
Bergembali mien we lagu biasa
Bedenne sehat penyakit pe jeger
Nge seger buger mien kaya-raya
Kekebeni Ayyub betala ringkese
Nyanya temase nge emeh i rasa
Lebih si banan bersusah diri
Tape gere ku kali wae musangka
Ke jema besilo ke kite beningen
Olok berlainen ari masa pudaha
Ke jema besilo imenne tipis
Pora kona bengis gerene rela
Sipet penyeber olok pedi kurang
Pora i gerantang ku kali musangka
Sawah ku kali beweh i uke e
Si gere ara pe i perinne nge ara
Cacat ni si rawan nge meh mujemur
Nge lagu si atur titik berkoma
Salah si rawan ara sejengkal salah
Renyel i tetamah menjadi seneta
Jeroh ni sirawan gerene teridah
Ke dirie salah gerene nyata
Padahal si rawan erep penejerne
Renyel iperenne peri benasa
Padahal si rawan orop i acue
Renyel iperenne nge hampir kunyawa
Banan si beta iperin Nabi-nte
Akhirat dunie mendapat celaka
Wo kaum ibu gelah seber ate
Si lebih kurangnge i seberen pora
Enti karna kaum ibu nge berseber ate
Dabuh kite rawan pe kase tingang ora
Padahal jema rawan kire kin pemimpin
Wajib menjamin iwan rumah tangga
Bugelah gati bersitiron ijin
Bersimat jarin setiep masa
Kite jema rawan turah tanggung jeweb
Enti tangkap arap udah timul dawa
Ike nge dawa menurut biasae
Si gele rejekinte pe dabuh musangka
Ke kite tukang dewe ke akhir kemudienne
Ku anak tepe kase mujadi pusaka
Si kite buetten bewenne we pane
Akhir kemudienne we mujadi celaka
Cukup kin ibarat we lagu nini
Bu kite pikiri urum jantung rasa
Kenesal mulo ara ke untungen
Kemelas puren kase mujadi hampa
Banta Aman Farida. Lahir pada tahun l929 di Bebesen. Latar belakang pendidikannya adalah pesantren. Selain sebagai pencipta Saer Gayo Banta Aman Farida juga sekaligus sebagai Ceh Didong yang tergabung dalam grup Kabinet. Karya dan ekpresi terakhirnya terangkum dalam sebuah album Audio Visual (VCD) bersama Ceh Daman, Toet, AR. Moese, Ramlah, Mustika Ajerso, Suprapto dan sejumlah seniman muda Gayo lainnya dalam album yang bertajuk “Belbes” Dewan Kesenian Takengon (Dekate) tahun 2003. Saer di atas dipetik dari “Antologi Syair Gayo” yang dieditori oleh LK. Ara, 2009) [SY]