Kekeberni Canang

oleh

[Sastra Gayo]
Ishak Ali

Kekeberni Canang

Wo suderengku gelah tenang-tenang
enge terlukis enge terbayang
kekeberni canang malé kucerite
resam jemen enge mukemang
sayang pedi nasipni canang
waktu lues belang turun ku ume

Sentan meling canang olok pedi rami
renyel meh rapat si kuen kiri
bier ari isi beraté suke
si muguel gegedem pané penadi
tingkahni memong si paling seni
nasipni canang sayang penadi
waé igunei waktu mungerje

Mujadi resam masa pudaha
sentan meling canang eméh gelana
kuken ku towa si memude
jema tue lalé terpesona
nisipni canang ara sayang pora
urum porolni nangka we idere

Si mudaté enge kelalén
lingni kuen kiri gere bersipengén
enge nanangen canang sedenge
tingkah pitu si muguel gegedém
pumu mugerik sire pejém-jém
enge mujejém si tawar buke

Si tetue kunulé akok sap mangas urum rokok
kupi wan mangkok tene muliye
si muningkah enge mugeropok
nasipni canang sayang olok
waé i pepok urum gelowah jewe

Oya keta gureé i masa pudaha
guneni canang kati gembira
até meréla tue mude
waktu mangan kuéh turun ku kala
si munarang egong rowa jema
isoné sunting enge réla
arih-arih itona kat mulo koro

Séni canang paling muriah
ke enge meling gerené gunah
kedik marak-marak si memude
makin kona munaik ni umah
ku reje tiang tawar i tetah
bertari kédah arapni reje

Arani canang i masa pudaha
gerené asing i masa Sengeda
sunting gegenta i masa sudenge
ari Reje Bukit bergeral Sengeda
tari guel kati ara
bintang di karang kati uwet mera
enti salah sangka wo si memude

Asalni suling pé gere ari Hindia
repaipé nume ari Malaysia
Gajah Putih kati mera uwet ku dunie
canangpé iguel turah ara
suling serunépé turah kona
taripé turah mugempa
baro mera itona ku Kute Reje

Gelah selesé ipengé terang
delé guneé keta canang
gelah mi mukemang bierpé muganti masa. [SY]

Comments

comments

Tinggalkan Balasan

Alamat email Anda tidak akan dipublikasikan. Ruas yang wajib ditandai *

No More Posts Available.

No more pages to load.