[Syaer Gayo] Banta Aman Farida
Tep Onem
Wo suderengku enti mulo inger
Ini male kuseder kin eseng-eseng
Isawahni jema si ara mubiner
Nge dabuh inger terpuk urum peséng
Asal usulé si ara mubawat
Kerna jantar pengat dabuh igoréng
Kejantar masam jaing nume si mekat
Awas bedarat i pipis seleméng
Kegere salah munurut peninget
I bagin pejebet emping kekerséng
Sentan kupengé munemah sintak liet
Udah timul uyet gaéh kase pogéng
Ara séba kelop munaos kejeyen
Ike nge méh karanger renyel timul okéng
Paling ara lepas kin didong pengerjen
Ike ku pertandingen penyawahni loncéng
Ara jema kurang sentan kite jerip
Harus urum wajib ninsé seger teméng
Munurut bulang lagu si munertip
Sentan kite intip rupen tukang ronggéng
Kekubuet jeroh i emah peden
Bersidedalihen nge timul rengéng
Ike ku rezeki urum kaul niwen
Itekaren serben asal demu hépéng
I masa besilo si olok di celaka
Kampanye urum agama nge mudedengéng
Gere ne tebetih bajik urum nangka
Mungamoli hareta agama kin topéng
Banta Aman Farida. Lahir pada tahun l929 di Bebesen. Latar belakang pendidikannya adalah pesantren. Selain sebagai pencipta Syaer Gayo Banta Aman Farida juga sekaligus sebagai Ceh Didong yang tergabung dalam grup Kabinet. Karya dan ekpresi terakhirnya terangkum dalam sebuah album Audio Visual bersama Ceh Daman, Toet, AR. Moese, Ramlah dan sejumlah seniman muda Gayo lainnya dalam album yang bertajuk “Belbes” Dewan Kesenian Takengon (Dekate) tahun 2003. [SY]
*Telah dimuat dalam Tabloid LintasGayo Edisi 10, 7 Juni 2014
