*Sahuri Ramadana
Soboh lao waktu Ine uwet semiang
Pies jepang renye mujerang
Ama muremes parang
Pasang baji peneking ni jelbang
Leboh ni mata ku éngon gere ilen terang
Munéngon Ine nekul ni kami sawah ku beru bujang
Terbayang Ama i sagi dapur munyapu laoh rom bise ni kerlang
Ine…
Galakku gere mujung semayangmu gere mubatas
Buge kire pantas kasé kami mubeles jasa
Ine….
Terang lao ku éngon nge tepat i perempusen
Rum time kucak kin pelélon
Kerkek ni kerusung sawah até mukaru bimang
Muninget kin anak rasa terih nge méh temerbang
Ama…
Baji nge siep bepasang
Parang nge siep kin penebang|
Menengon empus nge méh lapang
Até pekekit nge méh tenang
Keleték kulit galak ipanang
Keleték jepang kin penemah dediang
Sepatu gerbuk dor ipasang
Karna jep soboh munétéi karang
Sire munéméng jelbang
Mungenal nemah kin aku si iranto dagang
Ama…
Remenang ni laoh kin pekekit niaté
Muningeti kami sitengah sekulah
Buge enti musirang sabé
Kire sawah salam rom doaku kuwan nipimu
Kin penenang naté penyemangat wan ni muripmu
Baji kayu kin saksi bisu
Simunéngon kin kejang payahmu
Buge kasé muripte dis lagu jema. [SY]
Sahuri Ramadana adalah penulis muda Gayo, saat ini duduk dibangku perkuliahan STAIN GP Aceh Tengah, Program Studi Komunikasi dan Penyiaran Islam (KPI). Salah satu karyanya adalah buku Motivasi “Pelajar Harus Belajar” yang memotivasi pelajar Aceh Tengah dan Bener Meriah.
