i pilih gelah i pilah

oleh

[Syaer Gayo]

          Feri Yanto

 

Waktu nge rap sawah
Nge teridah kutanggal siwah
Gere dalih beraté gunah
Kusahen malé i serahen amanah

Keta gelah kusi bijak kin perawah
Ku si teger kin penemah
Buge tuah mujadi kin uah
Suara enti i kekuah

Pilihen enti bebarang osah
Ike nge king niet ari umah
Tujuenpé enti mupepinah
Sebeb akibetté mera mukunah

Pilih gelah bepilah
Ku jema si nguk munarang amanah
Nume si kolak awah urum pecogah
Atauwe jema rie siberédang nemah urum rupiah

Jema simera munarang beret nasip ni rakyat
Ringen pumu urum masin ni délah
Nume jema si mera pusesorah
Rakyat nyaya wé si bermewah-mewah

Nume jema si berkhianat ku rakyat
Mujuel keramat mupakat malé kin pangkat
Jema si mera kin pong mongot
Nume wakil ni sesongot

Sibeluh kire selalu gere ku kuen gere ku kiri
Si king munamat janyi den peduli
Beluh kerna ara si rai
Den sediken ulakpé ara si mai

Kami rakyat gerené harap semelah
Percaya gere sengkerat
Buge enti salah utusen ni rakyat
Si amanah urum si mutimang berat
Si berperi lemut berbudi belangi
Taat kuagama den ibadahpé kuet

Gelah ipilah sebelem mumilih
Gelah tar rues enti tar tingki

Selamat mumilih wakil rakyat
Tanggal siwah ulen opat 2014 [SY]

 

Takengon, April 2014

Feri Yanto, mahasiswa Universitas Gajah Putih Takengon

Comments

comments

Tinggalkan Balasan

Alamat email Anda tidak akan dipublikasikan. Ruas yang wajib ditandai *

No More Posts Available.

No more pages to load.